ເຕະບານ ລາລີກ້າ ລະດູການໃໝ່ 2022-23 ນັດທີ 3 ໃນຄືນວັນທີ 28 ສິງຫາຜ່ານມາ, ທັບຣາຊາຊຸດຂາວ ຣຽວ ມາດຣິດ ແຊ້ມເກົ່າ ເຖິງວ່າແຕ່ລະນັດກວ່າຈະໄດ້ໄຊຊະນະມາບໍ່ງ່າຍ ແຕ່ຍັງສາມາດເກັບໄຊຊະນະຕໍ່ເນື່ອງ ຫລ້າສຸດບຸກຊະນະ ເອັສປັນຢໍລ 3-1 ມາດຣິດ ນຳກ່ອນຈາກ ວີນີຊີອຸສ ຈູເນ່ຍ ນາທີ 12′ ແຕ່ທ້າຍເຄິ່ງເວລາທີໜຶ່ງ ເຈົ້າບ້ານໄລ່ຕີສະເໝີຈາກ ໂຈເຊລູ ນາທີ 43′.

ມາເຄິ່ງເວລາທີສອງສູ້ກັນກັນໄດ້ຢ່າງສົມສັກສີ ແຕ່ແຊ້ມເກົ່າ ມາໄດ້ປະຕູທ້າຍເກມຈາກ ຄາຣິມ ເບັນເຊມ້າ ເຈົ້າຂອງລາງວັນນັກເຕະດີເດັ່ນຂອງເອີຣົບລະດູການຜ່ານມາ ນາທີ 88′ ແລະ ຍິງສົ່ງທ້າຍອີກໜຶ່ງປະຕູໄລຍະຕໍ່ເວລາບາດເຈັບ ນາທີ 90+10′ ແລະ ເບັນຈາແມັງ ເລຄອມເຕ້ ຜູ້ຮັກສາປະຕູຊາວຝຣັ່ງຂອງເຈົ້າບ້ານໄດ້ບັດແດງ ຍ້ອນສະກັດ ດານີ ເຊບາຢັອສ ກອງກາງຂອງມາດຣິດ ຈົບເກມ ຣຽວ ມາດຣິດ ແຊ້ມເກົ່າ ບຸກຊະນະ ເອັສປັນຢໍລ ສຸດມັນ 3-1 ເກັບໄຊຊະນະ 3 ນັດລວດ.

ນັດຕໍ່ໄປ ຣຽວ ມາດຣິດ ຈະເປີດບ້ານພົບກັບ ຣຽວ ເບຕິສ ທີມທີ່ຊະນະ 3 ນັດລວດເໝືອນກັນ ໃນວັນທີ 3 ກັນຍາທີ່ຈະມາເຖິງນີ້ ເວລາ 21:15.

Photo: Real Madrid C.F & LaLiga