ນິວຄາສເຊິນ ຢູໄນເຕັດ ທີມມະຫາເສດຖີໃນ ພຣີເມ່ຍລີກ ອັງກິດ ດຶງເອົາ ລໍຣິສ ຄາຣີອຸສ ຜູ້ຮັກສາປະຕູຊາວເຢຍລະມັນ ໄວ 29 ປີ ອະດີດຜູ້ຮັກສາປະຕູ ລີເວີພູລ ມາເສີມທັບ ເຊັນສັນຍາໄລຍະສັ້ນເຖິງເດືອນມັງກອນປີໜ້າ ພ້ອມເງື່ອນໄຂຕໍ່ສັນຍາຈົນຈົບລະດູການນີ້. ຄາຣີອຸສ ໝົດສັນຍາກັບ ລີເວີພູລ ຫລັງຈົບລະດູການຜ່ານມາ ພາຍຫລັງປ່ອຍຕົວໃຫ້ ຢູນ້ຽນ ເບີລິນ ຍືມຕົວ, ນິວຄາສເຊິນ ດຶງ ຄາຣີອຸສ ມາເສີມທັບ ເນື່ອງຈາກວ່າ: ຄາວ ດາໂລ ຜູ້ຮັກສາປະຕູມືສອງຊາວອັງກິດຂອງທີມ ມີອາການບາດເຈັບ ຈຶ່ງເອົາມາຊ່ວຍ ນິກ ໂປບ ຜູ້ຮັກສາປະຕູມື 1 ຂອງທີມ, ຂະນະທີ່ ມາຣຕິນ ບູບັບກ້າ ປ່ອຍໃຫ້ ແມນຢູ ຍືມຕົວ.

ສຳລັບ ລໍຣິສ ຄາຣີອຸສ ໂດ່ງດັງຍ້ອນຄວາມຜິດພາດໃນເກມຮອບຊິງ ຢູຟ້າ ແຊ້ມປ້ຽນລີກ ປີ 2018 ທີ່ສັງກັດເກົ່າ ລີເວີພູລ ເສຍໃຫ້ ຣຽວ ມາດຣິດ 1-3 ຈາກນັ້ນ ຫົງແດງ ປ່ອຍໃຫ້ ເບຊິກຕັສ ແລະ ຢູນ້ຽນ ເບີລິນ ໄດ້ລົງຫລິ້ນ 72 ນັດ.

Photo: Newcastle United