ໃນລະຫວ່າງວັນທີ 2-4 ກຸມພານີ້, ແຂວງຈໍາປາສັກ ຮ່ວມກັບ ພະແນກອຸດສາຫະກໍາ ແລະ ການຄ້າແຂວງ, ຄະນະພັກ-ອົງການປົກຄອງເມືອງປາກຊ່ອງ ແລະ ສະມາຄົມກາເຟລາວ ໄດ້ຈັດງານບຸນມະໂຫລານກາເຟ-ຊາ ພູພຽງບໍລະເວນ ປະຈໍາປີ 2023.
ພິທີເປີດງານຢ່າງເປັນທາງການ ຈັດຂຶ້ນໃນວັນທີ 2 ກຸມພາ ທີ່ຕະຫຼາດສະບາຍດີປາກຊ່ອງ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ຮອງປະທານປະເທດ, ທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ປະທານຈັດງານ, ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ຮອງລັດຖະມົນຕີກະຊວງກະສິກຳ-ປ່າໄມ້, ບັນດາທ່ານ ການນໍາແຂວງພາກກາງ, ພາກໃຕ້ ສສ ຫວຽດນາມ, ການນໍາແຂວງຊຽງແຕງ, ແຂວງພາວິເຮຍ ຣາຊະອານາຈັກກໍາປູເຈຍ ແລະ ການນໍາຈັງຫວັງອຸບົນຣາຊະທານີ ຣາຊະອານາຈັກໄທ, ພໍ່ແມ່ປະຊາຊົນເມືອງປາກຊ່ອງເຂົ້າຮ່ວມຢ່າງຫຼວງຫຼາຍ.
ກິດຈະກໍາພາຍໃນງານ ມີການວາງສະແດງກ່ຽວກັບ ກາເຟ-ຊາ ແລະ ສິນຄ້າອື່ນໆທີີ່ເປັນທ່າແຮງຂອງແຂວງ, ຂອງເມືອງປາກຊ່ອງ. ນອກນີ້ ຍັງມີການແຂ່ງຂັນການຊົງກາເຟທີີ່ເປັນເອກະລັກ, ມີການແຂ່ງຂັນກິລາ ແລະ ສິລະປະ, ມີການວາງສະແດງຮູບພາບວັດທະນະທໍາທີີ່ເປັນເອກະລັກ ພາຍໃຕ້ຫົວຂໍ້ ວັດທະນະທໍາກາເຟ ທີີ່ເປັນເອກະລັກທ້ອງຖິ່ນ, ການທ່ອງທ່ຽວສຶກສາເຂດປູກ-ຜະລິດກາເຟ. ງານຄັ້ງນີ້ ໄດ້ເຊີນຫົວໜ່ວຍທຸລະກິດເຂົ້າຮ່ວມວາງສະແດງ ແລະ ຈໍາໜ່າຍສິນຄ້າ 34 ຫົວໜ່ວຍ ລວມມີ 58 ຫ້ອງ, ປະກອບມີ ຫົວໜ່ວຍກຸ່ມຜູ້ຜະລິດເມືອງປາກຊ່ອງ, ສະຫະກອນກາເຟ-ຊາ, ບໍລິສັດເກັບຊື້ ແລະ ສົ່ງອອກກາເຟ, ສະມາຄົມກາເຟ, ສະມາຄົມຫັດຖະກໍາ, ໂຮງງານອຸດສາຫະກໍາປຸງແຕ່ງ, ທະນາຄານທຸລະກິດ, ທຸລະກິດຈໍາໜ່າຍພາຫະນະ, ກຸ່ມຜະລິດສິນຄ້າໜຶ່ງເມືອງໜຶ່ງຜະລິດຕະພັນ (ODOP), ຜູ້ຈໍາໜ່າຍຜະລິດ ຕະພັນກາເຟ ພາຍໃນແຂວງ, ຕ່າງແຂວງ ແລະ ພາກສ່ວນຕ່າງປະເທດ.
ສິນຄ້າທີ່ນໍາເຂົ້າມາວາງສະແດງ ແລະ ຈໍາໜ່າຍ ປະກອບດ້ວຍຜະລິດຕະພັນກະສິກໍາ ແລະ ອຸດສາຫະກໍາປຸງແຕ່ງ ເປັນຕົ້ນແມ່ນຜະລິດຕະພັນກາເຟ, ຊາ, ພືດຜັກ, ເຄື່ອງຫັດຖະກໍາຈັກສານ ໄມ້ປ່ອງ-ຫວາຍ, ຜ້າຝ້າຍ, ຜ້າໄໝ, ການໂຄສະນາແຫຼ່ງທ່ອງທ່ຽວ, ພາຫະນະ ແລະ ສິນຄ້າປະເພດຕ່າງໆ ທີ່ທາງອົງການປົກຄອງເມືອງປາກຊ່ອງໄດ້ຊຸກຍູ້ເຂົ້າມາຮ່ວມງານ ຈໍານວນ 100 ຮ້ານ. ມູນຄ່າສິນຄ້າທີ່ນໍາເຂົ້າມາວາງສະແດງ ແລະ ຈໍາ ໜ່າຍໃນງານ ປະມານ 5 ຕື້ກີບ, ຄາດຄະເນຈະມີເງິນໝູນວຽນໃນແຕ່ລະວັນ ປະມານ 11,5 ຕື້ກີບ. ໃນງານ ຍັງມີກອງປະຊຸມສາກົນ ເພື່ອສົ່ງເສີມການຄ້າ-ການລົງທຶນ ທັງເປັນການເຜີຍແຜ່ແນວທາງນະໂຍບາຍ ແລະ ຍຸດທະສາດການພັດທະນາກາເຟລາວ ໃຫ້ຍືນຍົງ ແລະ ຂະຫຍາຍຕົວ.
ຈຸດປະສົງໃນການຈັດງານຄັ້ງນີ້ ກໍເພື່ອເປັນການສືບຕໍ່ຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ກໍຄືແຜນພັດທະນາວຽກງານຂະແໜງອຸດສາຫະກໍາປຸງແຕ່ງ ແລະ ການຄ້າ 5 ປີ ຄັັ້ງທີ IX ຂອງແຂວງຈໍາປາສັກ ໃນການຊຸກຍູ້ສົົ່ງເສີມການຜະລິດເປັນສິນຄ້າຢູ່ພາຍໃນໃຫ້ເຂັ້ມແຂງ ທັງເປັນການສືບຕໍ່ຜັນຂະຫຍາຍໂຄງການງານບຸນກາເຟ-ຊາ ພູພຽງບໍລະເວນ ໃນແຕ່ລະປີ ຕິດພັນກັບການສົົ່ງເສີມດ້ານການຕະຫຼາດ ໃຫ້ໄດ້ຮັບການຈັດຕັັ້ງປະຕິບັດຢ່າງເປັນລະບົບຕໍ່ເນື່ອງ ແລະ ກາຍເປັນບຸນປະເພນີຂອງແຂວງ, ເປັນການໂຄສະນາເຄືີ່ອງໝາຍການຄ້າກາເຟແຂວງຈໍາປາສັກ, ພັດທະນາກາເຟຄຸນນະພາບສູງ, ປະກອບສ່ວນຍົກລະດັບຄຸນຄ່າ ແລະ ຢັ້ງຢືນເຖິງຖານະບົດບາດກາເຟຂອງແຂວງຈໍາປາສັກ ຢູ່ໃນເວທີຕະຫຼາດໂລກ ທັງເປັນການຍົກສູງ, ເຊີດຊູຜູ້ປູກ, ປຸງແຕ່ງ ແລະ ຜູ້ດໍາເນີນທຸລະກິດກາເຟ, ປຸກລະດົມການມີສ່ວນຮ່ວມ ໃນການພັດທະນາການປູກ ແລະ ຂະບວນການຜະລິດກາເຟ ຢູ່ ສປປ ລາວ ເວົ້າລວມ, ເວົ້າສະເພາະ ຢູ່ເຂດທ້ອງຖິ່ນແຂວງຈໍາປາສັກ.
ນອກນີ້ກໍເພື່ອນໍາສະເໜີຮູບພາບທີີ່ເປັນເອກະລັກກ່ຽວກັບວັດທະນະທໍາກາເຟ ທີີ່ຕິດພັນຄຽງຄູ່ກັບຄົນລາວເຮົາ, ບັນດາພື້ນຖານ, ທ່າແຮງ ແລະ ການທ່ອງທ່ຽວ, ດຶງດູດບັນດານັກລົງທຶນ, ນັກທ່ອງທ່ຽວພາຍໃນ ແລະ ຕ່າງປະເທດ ທີີ່ເດີນທາງເຂົ້າມາຢ້ຽມຢາມທ້ອງຖິ່ນແຂວງຈໍາປາສັກ ທັງເປັນການແລກປ່ຽນບັນດາມາດຕະການ ໃນການຈັດຕັ້ງປະຕິບັດ ການເຊືີ່ອມໂຍງການຄ້າ ແລະ ວິທີການພັດທະນາຂະບວນການຜະລິດຕ່າງໆ.
ຕອນທ້າຍພິທີ ກໍມີການຕັດແຖບຜ້າເປີດງານ ໂດຍການໃຫ້ກຽດຕັດແຖບຜ້າຂອງ ທ່ານນາງ ປານີ ຢາທໍ່ຕູ້, ທ່ານ ສົມມາດ ພົນເສນາ, ທ່ານ ວິໄລວົງ ບຸດດາຄໍາ. ພ້ອມນີ້ ທ່ານຮອງປະທານປະເທດແຫ່ງ ສປປ ລາວ ຍັງໄດ້ໃຫ້ກຽດລັ່ນຄ້ອງ 9 ບາດ ເພື່ອເປັນນິມິດໝາຍອັນດີ ແລະ ສິລິມຸງຄຸນແກ່ການເປີດງານ. ຈາກນັ້ນ, ການນໍາພັກ-ລັດ ທັງຈາກສູນກາງ ແລະ ທ້ອງຖິ່ນ ພ້ອມດ້ວຍແຂກທີ່ເຂົ້າຮ່ວມງານ ກໍໄດ້ທ່ຽວຊົມຮ້ານວາງສະແດງ ແລະ ຈໍາໜ່າຍສິນຄ້າ ຕື່ມອີກ.
(ຂ່າວ-ພາບ: ທູນທອງໃຈ)