ໃນວັນທີ 30 ທັນວາ 2022 ເຊິ່ງເປັນມື້ສຸດທ້າຍຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX, ທີ່ປະຊຸມແມ່ນໄດ້ພິຈາລະນາໃຫ້ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ອອກຮັບອຸດໜູນບຳນານ.
ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ໃຫ້ກຽດຂຶ້ນອ່ານການປະກາດພັກການບຳນານຂອງນາຍົກລັດຖະມົນຕີ ພັນຄຳ ວິພາວັນ ຕາມໜັງສືສະເໜີຂອງປະ ທານປະເທດ ເລກທີ 211/ປທທ, ລົງວັນທີ 28 ທັນວາ 2022 ໃນວາລະກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ຕອນແລງວັນທີ 12 ທັນວາ 2022.
ໃນໂອກາດດັ່ງກ່າວທ່ານນາຍົກລັດຖະມົນຕີແມ່ນໄດ້ກ່າວວ່າ ອີງຕາມອາຍຸຂອງຕົນ ແມ່ນໃກ້ເຂົ້າອາຍຸ 72 ປີແລ້ວ ການເປັນພະນັກງານລັດຖະກອນກໍໄດ້ເຂົ້າສູ່ການປະຕິວັດດົນນານສົມຄວນ ທີ່ສຳຄັນສຸຂະພາບຂອງຕົນກໍ່ບໍແຂງແຮງ ແລະອີງໃສ່ສະພາບຄວາມຫຍຸ້ງຍາກທາງດ້ານເສດຖະກິດໃນປະຈຸບັນແມ່ນບໍສາມາດແບກຫາບພາລະອັນໜັກໜ່ວງດັ່ງກ່າວໄດ້ອີກຈິ່ງສະເໜີຂໍລາອອກ ແລະໃຫ້ແຕ່ງຕັ້ງນາຍົກລັດຖະມົນຕີຄົນໃໝ່ມານຳພາຄະນະລັດຖະບານຕໍ່ໄປ.
ທ່ານນາຍົກພັນຄຳ ວິພາວັນຍັງກ່າວອີກວ່າ ຕະຫຼອດໄລຍະທີ່ຕົນໄດ້ເຂົ້າເຮັດວຽກໃນວົງການພັກ-ລັດ ແມ່ນໄດ້ເຄື່ອນໄຫວວຽກດ້ວຍຄວາມຮັບຜິດຊອບສູງ ບໍ່ວ່າຈະຢູ່ໃນຕຳແໜ່ງໃດໆ, ບໍ່ເຄີຍແລ່ນນຳຊື່ສຽງອື່ນໆ.
ເຖິງແນວໃດກໍ່ຕາມອີງໃສ່ສະພາບການຕົວຈີງຂອງສຸຂະພາບ ແລະຄວາມຫຍຸ້ງຍາກທາງດ້ານເສດຖະກິດໃນປະຈຸບັນ ຕົນບໍ່ອາດແບກຫາບໜ້າທີ່ອັນໜັກໜ່ວງນີ້ອີກຈິ່ງຂໍລາອອກເພື່ອຮັບອຸດໜູນບຳນານ.
ສຳລັບທ່ານ ພັນຄຳ ວິພາວັນ ແມ່ນເກີດເມື່ອວັນທີ 14 ເມສາ ປີ 1951 ມາຮອດປະຈຸບັນອາຍຸໄດ້ 71 ປີບໍລິບູນ ແລະທ່ານໄດ້ ຮັບການແຕ່ງຕັ້ງເປັນນາຍົກລັດຖະມົນຕີແຫ່ງ ສປປ ລາວ ໃນວັນທີ 22 ມີນາ 2021.
ກົດເບິ່ງວີດີໂອ