Lao people’s Army News, ໃນວັນທີ 5 ກັນຍານີ້, ສະ ຫາຍ ພົນເອກ ຈັນສະໝອນ ຈັນ ຍາລາດ ກຳມະການກົມການ ເມືອງສູນກາງພັກ, ຮອງນາຍົກ ລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ພ້ອມດ້ວຍຄະນະນຳກະຊວງປ້ອງກັນປະ ເທດ, ບັນດາກົມໃຫຍ່ ແລະ ພາກ ສ່ວນທີ່ກ່ຽວຂ້ອງໄດ້ລົງຊີ້ນຳ ແລະ ສັງເກດການ, ການຫັດແອບ ກອບກູ້ໄພພິບັດ (ຝ່າຍດຽວ).
ສະຫາຍ ພົນຈັດຕະວາ ສົມ ພອນ ມິດຕະພອນ ຮອງຫົວໜ້າ ກົມໃຫຍ່ເສນາທິການກອງທັບ, ຮອງຫົວໜ້າຄະນະຊີ້ນຳວຽກງານເຝິກຊ້ອມໄພພິບັດຮ່ວມ 3 ກອງທັບ (ລາວ, ຫວຽດນາມ ແລະ ກຳປູເຈຍ) ໄດ້ລາຍງານກ່ຽວກັບການກະກຽມຄວາມພ້ອມດ້ານຕ່າງໆ ໃຫ້ສະຫາຍລັດ ຖະມົນຕີກະຊວງປ້ອງກັນປະເທດຊາບ.
ພ້ອມດຽວກັນນີ້ ສະຫາຍຍັງໄດ້ເຂົ້າຮ່ວມສັງເກດການ ແລະ ຮັບຊົມການຫັດແອບ, ໂດຍເນື້ອໃນຂອງການຫັດແອບແມ່ນແບ່ງອອກເປັນ 2 ພາກສ່ວນ ໃຫຍ່ຄື: ການຊອກຄົ້ນ-ກອບກູ້ຜູ້ປະສົບໄພທາງນ້ຳ ເຊິ່ງຈັດຕັ້ງ ອອກເປັນ 3 ຈຸ, ໃນນີ້ແຕ່ລະຈຸຈະມີໜ້າທີ່ລະອຽດດັ່ງນີ້: ຈຸທີ 1 ແມ່ນຈະໃຊ້ເຮືອລາດຕະເວນຈຳນວນ 6 ລຳ, ເພື່ອຊອກຫາຜູ້ປະສົບໄພທີ່ຕົກຄ້າງຢູ່ຕາມຈຸດຕ່າງໆ, ຈຸທີ 2 ແມ່ນຊອກຄົ້ນກອບກູ້ຜູ້ປະສົບໄພທີ່ຈົມຢູ່ໃຕ້ນໍ້າດ້ວຍນັກດຳນ້ຳ, ສ່ວນຈຸທີ 3 ແມ່ນກອບກູ້ ແລະ ຍົກຍ້າຍຜູ້ປະ ສົບໄພ ຫຼື ຜູ້ບາດເຈັບດ້ວຍເຮືອໄປຫາເຂດທີ່ປອດໄພ, ຫຼັງ ຈາກນັ້ນ ທະຫານອາກາດຈະ ນຳໃຊ້ເຮືອບີນ Z-9 ບິນລາດ ຕະເວນຊອກຄົ້ນຜູ້ປະສົບໄພຕາມຈຸດຕ່າງໆທີ່ເຮືອບໍ່ສາມາດເຂົ້າເຖິງ ແລະ ໃຊ້ເຮືອບິນ Mi-17 ບິນຍົກ-ຢ່ອນນັກກອບກູ້ໄພລົງຊ່ວຍເຫຼືອຜູ້ປະສົບໄພທີ່ຢູ່ຈຸດສູງ ທຸລະກັນດານ ແລະ ຂອບເຂດນ້ຳຖ້ວມທີ່ມີສິ່ງກີດຂວາງ, ຕົ້ນໄມ້ຫັກທັບຖົມ.
ຕໍ່ມາເຫຼົ່າຮົບເສນາຮັກກໍໄດ້ຊອກຄົ້ນຮ່ວມກັບເຫຼົ່າຮົບຊ່າງແສງ ພ້ອມທັງຄັດແຍກປະເມີນສະພາບຂອງຄົນເຈັບ ແລະ ນຳສົ່ງຄົນເຈັບໄປຫາໜ່ວຍປະຖົມພະຍານບານໃນເບື້ອງຕົ້ນ ແລ້ວສົ່ງໄປຍັງໂຮງໝໍສະໜາມຕາມອາການ, ເມື່ອມາຮອດຈຸດ ດັ່ງກ່າວຈະມີການກວດກາຕິດ ຕາມຄົນເຈັບພ້ອມທັງປິ່ນປົວ ຄົນເຈັບ ແລະ ແຍກປ່ຽວຄົນເຈັບທີ່ຖືກສານເຄມີ ແລ້ວນຳສົ່ງໂຮງໝໍແນວຫຼັງ. ສຳລັບພາກທີ 2 ແມ່ນການຊອກຄົ້ນ-ກອບກູ້ຜູ້ປະສົບໄພທາງບົກ ໂດຍເຫຼົ່າຮົບຊ່າງແສງຮ່ວມກັບເຫຼົ່າຮົບເສນາຮັກເຮັດການຊອກຄົ້ນຜູ້ປະສົບໄພອອກຈາກຕຶກອາຄານຖະຫຼົ່ມ ແລະ ເຂດພູດິນເຈື່ອນ, ຄຽງຄູ່ກັບເຫຼົ່າຮົບເຄມີກໍໄດ້ເຮັດການຊ່ວຍເຫຼືອຜູ້ທີ່ໄດ້ຮັບຜົນກະທົບຈາກສານເຄມີ, ຈັດຕັ້ງກວດກາ, ວິເຄາະຕົວຢ່າງສານເຄມີ ພ້ອມທັງລົບລ້າງແລ້ວສົ່ງຕໍ່ໃຫ້ແກ່ເຫຼົ່າຮົບເສນາຮັກ ໂດຍມີການແຍກຄົນເຈັບອອກເປັນ 4 ສີ ຄື: ອາການໜັກ(ສີແດງ), ອາການປານກາງ(ສີເຫຼືອງ), ອາການເບົາ(ສີຂຽວ) ແລະ ເສຍຊີວິດ (ສີດຳ).
ພ້ອມດຽວກັນນັ້ນທະ ຫານອາກາດກໍໄດ້ນຳເອົາເຮືອບິນ Mi-17 ລົງຈອດສຸກເສີນເພື່ອຮັບເອົາຄົນເຈັບໜັກໄປຫາໂຮງໝໍແນວຫຼັງເພື່ອໃຫ້ຄົນເຈັບໄດ້ຮັບການປິ່ນປົວໃຫ້ປອດໄພ ແລະ ທັນເວລາ. ພາຍຫຼັງສຳເລັດຊົມການຫັດແອບແລ້ວ, ສະຫາຍລັດຖະມົນຕີກະຊວງປ້ອງກັນປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ໄດ້ເອົາໃຈໃສ່ຕໍ່ການຫັດແອບໃນຄັ້ງນີ້ ພ້ອມທັງເນັ້ນໜັກຫຼາຍບັນຫາສຳຄັນຕໍ່ຄະນະຮັບຜິດຊອບແຕ່ລະຂັ້ນໃຫ້ເອົາໃຈໃສ່ຊີ້ນຳບາງໜ້າວຽກທີ່ຍັງບໍ່ທັນສອດຄ່ອງ ໂດຍໃຫ້ແຕ່ລະພາກສ່ວນຮັບຜິດຊອບຮີບຮ້ອນພ້ອມກັນແກ້ໄຂ ບໍ່ວ່າຈະເປັນຂອດປະສານງານໃນການພົວພັນຮ່ວມມື, ດ້ານພາຫະເຕັກນິກ, ຈຳນວນພົນແຕ່ລະເຫຼົ່າຮົບ ຕ້ອງເປັນເຈົ້າການຈັດຕັ້ງປະຕິ ບັດບັນດາໜ້າວຽກຂອງຕົນໃຫ້ສຳເລັດ ແລະ ທ່ວງທັນກັບໄລຍະເວລາໃນການເຝິກຊ້ອມກອບກູ້ໄພພິບັດໃນຄັ້ງນີ້ບັນລຸໄດ້ຜົນສຳເລັດ100%.
